రాఘవేంద్ర మండపం ఆదాయం ప్రజాసేవకే.. రజనీకాంత్ పాత వ్యాఖ్యలు మళ్లీ వైరల్

సూపర్ స్టార్ రజనీకాంత్ తన ఆస్తి గురించి గతంలో చేసిన కొన్ని వ్యాఖ్యలు ఇప్పుడు సోషల్ మీడియాలో మళ్లీ చర్చనీయాంశమయ్యాయి. చెన్నైలోని రాఘవేంద్ర కల్యాణ మండపం ద్వారా వచ్చే ఆదాయాన్ని ప్రజాసేవకు వినియోగిస్తానని గతంలో ఆయన చెప్పిన పాత వీడియో ఒకటి ఇప్పుడు వైరల్ అవుతోంది. అయితే, ఈ వ్యాఖ్యలను వక్రీకరించి, తన యావదాస్తిని సేవా కార్యక్రమాలకు ఇస్తున్నారని, కుటుంబానికి ఏమీ ఇవ్వడం లేదని ప్రచారం జరుగుతుండటం గమనార్హం.

వాస్తవానికి, రజనీకాంత్ ఆ వ్యాఖ్యలు చేసింది కేవలం కోడంబాక్కంలోని రాఘవేంద్ర కల్యాణ మండపం గురించి మాత్రమే. సుమారు ఎకరా పావు విస్తీర్ణంలో ఉన్న ఆ మండపాన్ని తన తదనంతరం రాఘవేంద్ర పబ్లిక్ చారిటబుల్ ట్రస్ట్‌కు చెందేలా వీలునామా రాశానని ఆయన అప్పట్లో తెలిపారు. దాని ద్వారా వచ్చే ఆదాయంలో ఒక్క పైసా కూడా తన కుటుంబానికి వెళ్లకూడదని, అది పూర్తిగా ప్రజల కోసమే వినియోగించాలని స్పష్టం చేశారు.

టికెట్లు కొని తనను ఈ స్థాయికి తీసుకొచ్చిన తమిళ ప్రజలకు ఏదైనా తిరిగి చేయాలనే ఉద్దేశంతోనే ఈ నిర్ణయం తీసుకున్నట్లు రజనీకాంత్ ఆ వీడియోలో పేర్కొన్నారు. ఈ విషయాన్ని తన భార్య లత, కుటుంబ సభ్యులతో చర్చించిన తర్వాతే నిర్ణయం తీసుకున్నానని కూడా వివరించారు.

ప్రస్తుతం ఈ మండపం ప్రాంగణాన్ని హోటల్‌గా అభివృద్ధి చేసే అవకాశాలు ఉన్నాయని కొన్ని కథనాలు రావడంతో ఈ పాత వీడియో మళ్లీ తెరపైకి వచ్చింది.